İlham Əliyev və Serj Sərkisyanın iyun görüşü ola da, olmaya da bilər.

Axar.az xəbər verir ki, bunu "Moskva-Baku" portalına açıqlamasında rusiyalı politoloq Qriqori Trofimçuk söyləyib. Onun sözlərinə görə, bu görüşə hər kəsdən öncə Azərbaycan hazırlaşır:

"Ermənistan iyun görüşündə heç nə həll etmək istəmir. Bu istək aprel hadisələrindən sonra daha da aktivləşib. Əgər birdən Serj Sərkisyan təzyiqlə və ya heç bir təzyiqsiz nəsə etsə, böyük problemlərlə qarşılaşacaq. Həmin dəqiqə Sərkisyanı torpaqları verməkdə günahlandıran müxalifət baş qaldıracaq. Artıq Vyanada bir sıra məsələlər razılaşdırılmalı idi. İstənilən halda iyun görüşü formal olacaq. Yəni ən yaxşı halda görüş baş tutacaq. Nəticədə danışıqların bütün regional iştirakçıları – Azərbaycan, Ermənistan və Rusiya üçün çətin situasiya yaranacaq. Əslində, kiminsə Azərbaycana torpaq qaytarmağa hazırlaşmasına inanmaq sadəlövhlük olardı. Amma hər şeyə rəğmən, Azərbaycan Vyanada ciddi addım atdı. O, ABŞ Dövlət Departamentinin rəhbəri Con Kerrinin yanında Rusiyaya mesaj verdi ki, əgər nəsə olsa, kömək üçün Amerikaya müraciət edəcək".

Politoloq bildirib ki, ABŞ-ın yardımı real olmayacaq:

"Dövlət Departamenti köməyə söz verər, amma sonra Bakıya "kömək görüntüsü" nümayiş etdirər... Yəni bu, sadəcə, imitasiya olacaq. Əgər İrəvan Vaşinqtonun xeyrinə addım atmasa, o zaman Sərkisyana Ermənistan daxilindən müxalifət vasitəsilə təzyiq ediləcək. Amerika heç vaxt hansısa torpağı geri qaytarmağa yardım etmir. Burada yeganə istisna Şərqi Almaniyadır".