Suriyanın gələcək konstitusiyası ilə bağlı işlər yekunlaşıb. Rusiya tərəfindən hazırlanan ali qanun layihəsinin ABŞ-a göndərildiyi iddia olunur.

Axar.az xəbər verir ki, yeni konstitusiyaya əsasən, prezidentin səlahiyyətləri azaldılacaq, Nazirlər Kabinetinki artırılacaq.

Yerli idarəçilik gücləndiriləcək. Bunun Rojavadakı kürd rəhbərliyi ilə razılaşdırıldığı deyilir.

Ölkənin rəsmi dili ərəbcə ilə yanaşı etnik birliklərin dillərinin istifadəsi də qanuniləşəcək.

Rusiyanın hazırladığı konstitusiyaya görə, Suriya Ərəb Respublikası bundan sonra "Suriya Respublikası" adlandırılacaq.

Ayrıca, konstitusiya andındakı "İctimai ədalət və ərəb xalqının birliyi üçün çalışmaq" ifadəsi də ləğv olunub. Bunun əvəzinə yeni Konstitusiya layihəsinə "sərbəst iqtisadiyyat" və "vətənpərvərlik" sözləri daxil edilib.

ABŞ və Rusiya yeni konstitusiyanın avqusta qədər tamamilə işlənib hazırlanmasını planlaşdırır.