Anası ilə Azərbaycana gəlmiş və formallıqların dəqiqləşdirilməsi üçün Bakı hava limanında saxlanılmış 8 yaşlı Rusiya vətəndaşı Luka Rubenoviç Vardanyan hazırda anası ilə birlikdə Bakıdadır.

Bunu Trend-ə Rusiyanın Azərbaycandakı səfirliyindən bildiriblər.

"Mayın 29-da təxminən saat 13-də Rusiya səfirliyinə zəng daxil olub ki, Bakı beynəlxalq hava limanında Bakıya gəlmiş 8 yaşlı Rusiya vətəndaşı Luka Rubenoviç Vardanyan pasport qeydiyyatını keçərkən Azərbaycan ərazisinə buraxılmasında problemlər yaranıb. Dərhal hava limanına səfirliyin əməkdaşı gəlib. Yerli hakimiyyət orqanları ilə razılaşdırılaraq, uşağa ölkəyə girişə imkan verilib. Hazırda o, anası ilə birlikdə Bakıdadır", - səfirliyin məlumatında belə deyilir.

Qeyd edək ki, Rusiyanın tanınmış qənnadçısı və fotoqrafı Kristina Konstantinova ikinci həyat yoldaşı və 8 yaşlı oğlu ilə birgə bu gün Bakıya gəlib. Kristina Konstantinova əvvəllər Ruben Vardanyan adlı erməni ilə ailəli olub. 8 yaşlı Luka Vardanyanın atası da Ruben Vardanyandır.

Heydər Əliyev Bakı Beynəlxalq Hava Limanının sərhəd-keçid məntəqəsində 8 yaşlı Luka Vardanyan saxlanılmışdı. Məlum olmuşdu ki, azyaşlı Bakıya atasının razılığı olmadan gətirilib. Halbuki 18 yaşınadək şəxslər bir ölkədən digər ölkəyə mütləq valideynlərinin hər ikisinin razılığı ilə aparıla bilər.

Dövlət Sərhəd Xidmətinin Bakı aeroportundakı nümayəndələri bildiriblər ki, Azərbaycan Luka Vardanyanı ölkəyə buraxmağa hazırdır:

"Ancaq onun atası işə qarışıb. Heç bir deportasiyadan söhbət gedə bilməz. Azərbaycan ölkəyə gələn başqa turistlər kimi həmin uşağın da təhlükəsizliyini təmin etməyə hazırdır".