Ərdoğan Rusiya-Türkiyə əlaqələrinin normallaşması üçün dövlət televiziyasına çıxıb Rusiya xalqından üzr istəsin.

Axar.az xəbər verir ki, bunu Rusiya Federasiya Şurasının Xarici Əlaqələr Komitəsinin üzvü İqor Morozov Türkiyə XİN rəhbəri Mövlud Çavuşoğlunun təklifinə münasibət bildirərkən deyib.

Onun sözlərinə görə, Türkiyə Prezidenti Rəcəb Tayyib Ərdoğan rəsmi şəkildə üzr istəyərsə, əlaqələr normallaşa bilər:

"Türkiyə prezidenti bu problemi çox asan bir şəkildə düzəldə bilər. Dövlət televiziyasına çıxıb yaşananlardan ötəri Rusiya xalqından üzr istəyər. Sonra Rusiya və Türkiyə arasındakı əlaqələrdə hər şey qaydasına düşər. Hətta işçi qrupuna belə ehtiyac qalmaz".

Xatırladaq ki, Türkiyə xarici siyasət idarəsinin rəhbəri Mövlud Çavuşoğlu iki ölkə arasında əlaqələrin normallaşması üçün işçi qrupu yaradılmasını təklif etmişdi.