Qənirə Paşayeva Almaniya parlamentinin qondarma erməni soyqırımını müzakirəyə çıxarmasına qarşı çağırış edib.

Axar.az xəbər verir ki, millət vəkili Bakıda səfərdə olan Türkiyənin Böyük Birlik Partiyasının başqanı Mustafa Dəsticinin rəhbərlik etdiyi nümayəndə heyəti ilə görüşüb.

Görüşdə Dağlıq Qarabağ problemi, Xocalı soyqırımı, qondarma erməni soyqırımı iddiaları ilə bağlı geniş fikir mübadiləsi aparılıb.

Millət vəkili qeyd edib ki, Almaniya Bundestaqında qondarma erməni soyqırımı ilə bağlı sənədin iyunun 2-də səsverməyə qoyulması dünyanın hər yerində yaşayan türk kökənli insanları narahat etməlidir və bunun qarşısını almaq üçün diaspor ilə bərabər, türk dövlətləri də özünün ciddi etirazını Berlinə çatdırmalıdır.

Bu müzakirə və səsvermələrin Almaniyanın ATƏT-in Minsk Qrupundakı missiyasına böyük zərbə olduğunu vurğulayan deputat bildirib ki, belə bir sənədin qəbulu Almaniyanın Dağlıq Qarabağ probleminin həllində obyektiv mövqe tutacağını tam şübhə altına alacaq.