Azərbaycan, Rusiya və İran prezidentlərinin üçtərəfli görüşü ilə bağlı detallar görüşün dəqiq vaxtı müəyyənləşdikdən sonra bəlli olacaq.

Bu sözləri Axar.az-a açıqlamasında millət vəkili, politoloq Rasim Musabəyov deyib. Deputat üç ölkə rəhbərinin Bakı görüşünü şərh edib:

"Azərbaycan, Rusiya və İran prezidentlərinin üçtərəfli görüşünün gündəliyi hələ məlum deyil. Hələlik onu söyləmək mümkündür ki, sözügedən dövlətlər arasında üçtərəfli əməkdaşlıq zəruridir və rəhbərlər də məhz bunu ən yüksək səviyyədə təşkil etmək üçün bir araya gəlmək niyyətindədirlər. Üçtərəfli əlaqələrlə yanaşı, nəqliyyat, energetika sahəsi formatın əsasını təşkil edəcək. Detallar görüşün dəqiq vaxtı müəyyənləşdikdən sonra bəlli olacaq. Qarabağ məsələsinin nəzərdən keçiriləcəyi istisna edilməsə də, bu, həll prosesi ilə bağlı görüş deyil".

Qeyd edək ki, Azərbaycan, Rusiya və İran prezidentlərinin ilin ikinci yarısında Bakıda üçtərəfli formatda görüşünün keçiriləcəyi gözlənilir.