Ana səhifə Toplum |
Azərbaycanda Milli Məclis tərəfindən qəbul edilmiş
növbəti Amnistiya Aktının icrası davam edir.
APA-nın xəbərinə
görə, akt qadın məhkumların saxlandığı 4 saylı Cəzaçəkmə
Müəssisəsində icra olunub. Amnistiya aktının şamil olunduğu
məhkumlardan üçü azadlığa buraxılıb.
Amnistiya aktına düşən digər məhbusların dörd ay ərzində
müəssisədən azad olunması nəzərdə tutulur.
Bununla bağlı təşkil olunan mərasimdə Ombudsman Elmira
Süleymanova, Ədliyyə Nazirliyi Penitensiar Xidmətinin idarə rəisi
Mirsaleh Seyidov, "Konstitusiya" Araşdırmalar Fondunun prezidenti
Əliməmməd Nuriyev də iştirak edib.
Ombudsman Elmira Süleymanova qadın məhkumlarla tez-tez
görüşdüklərini, onların xahişlərini dinlədiklərini, amnistiya, əflə
bağlı müraciət etdiyini deyib: "İndiyə qədər 518 nəfər bizim
vəsatətlə azad olunub. Əfv və amnistiya olduqca vacibdir".
E.Süleymanova sonuncu 4 amnistiya aktının Heydər Əliyev Fondunun
prezidenti, millət vəkili Mehriban Əliyevanın təşəbbüsü ilə qəbul
olunduğunu xatırladaraq "Azərbaycan yeganə ölkədir ki, qısa zamanda
11 amnistiya aktı, 61 əfv sərəncamı imzalanıb. Bu, böyük rəqəmdir",
- deyə bildirib.
Qeyd edək ki, bu gün Azərbaycanda Milli Məclis tərəfindən qəbul
edilmiş növbəti Amnistiya Aktının icrasına başlanılıb.
Bu il mayın 20-də Milli Məclisin xüsusi iclasında Heydər Əliyev
Fondunun prezidenti, millət vəkili Mehriban Əliyevanın təşəbbüskarı
olduğu "28 May – Respublika Günü münasibətilə amnistiya elan
edilməsi haqqında" qərar layihəsi qəbul edilib.
Amnistiya aktına əsasən, böyük
ictimai təhlükə törətməyən cinayətlərə görə məhkum edilmiş bütün
şəxslər, bir sıra az ağır cinayətlərə görə məhkum edilmiş qadınlar,
cinayət törədərkən 18 yaşına çatmayanlar, əlillər, 60 yaşına çatmış
kişilər, öhdəsində yetkinlik yaşına çatmayan, yaxud birinci və ya
ikinci qrup əlil övladı olanlar, Azərbaycanın suverenliyinin və
ərazi bütövlüyünün qorunması uğrunda döyüşlərdə iştirak etmiş,
Azərbaycan ərazilərinin bir hissəsinin işğalı nəticəsində öz doğma
torpaqlarından məcburi köçürülmüş və bəzi digər kateqoriyalardan
olan şəxslər azadlıqdan məhrumetmə cəzasından azad
ediləcəklər.
Həmçinin azadlıqdan məhrum etmə cəzasının çəkilməmiş hissəsi 1
ildən artıq olmayan məntəqə tipli cəzaçəkmə müəssisələrində cəza
çəkən, islah işləri ictimai işlər cəzalarına məhkum edilmiş bütün
şəxslərə, habelə cərimə cəzasına məhkum edilmiş, cəzasının
çəkilməsi təxirə salınmış, şərti məhkum edilmiş və digər qruplara
daxil olan bir sıra məhkumlar amnistiya tətbiq edilməklə cəzadan
azad olunacaqlar.
10 minə yaxın şəxs amnistiya aktının təsiri altına düşəcək,
onlardan 3500-ə yaxın məhkumun azadlıqdan məhrum etmə yerlərindən
azad ediləcək.
Tarix
2016.06.15 / 11:05
|
Müəllif
Axar.az
|