Gədəbəydə güclü yağış və selin fəsadları aradan qaldırılır. Kənd yolları xüsusi texnika vasitəsilə təmizlənir. Qəzalı vəziyyətdə olan 6-ya yaxın körpü təmir olunur. Sel nəticəsində kənd yollarının kənarında sürüşmə iri çuxurların yaranmasına səbəb olub.

ANS-nin məlumatına görə, təbii fəlakət nəticəsində Gədəbəyin Düz Rəsullu, Çay Rəsullu, Göyəlli və digər kəndləri Axınca çayının daşması nəticəsində xeyli ziyan çəkib. Düz Rəsullu kənd sakini 32 yaşlı Osman Rzayev çaydan keçmək istəyərkən selə düşüb və həyatını itirib. Təbiətin şıltaqlığı kənd təsərrüfatına da ciddi ziyan vurub. Əkin sahələri selin altında qalıb. İri və xırda buynuzlu mal-qara tələf olub.

Yerli sakinlər sonuncu dəfə belə güclü yağışın 30 il əvvəl yağdığını deyirlər. Güclü yağış və selin vurduğu ziyanla bağlı təxmini göstəricilər artıq məlumdur.

Fövqəladə Hallar Komissiyasının sədri Qüdrət Paşayevin sözlərinə görə, 70-ə yaxın xırda buynuzlu, 15 iribuynuzlu mal-qara məhv olub. Eləcə də 1000 hektar əkin sahəsinə ziyan dəyib. Bir neçə ev qəzalı vəziyyətə düşüb. Rayona dəyən ziyan yaxın günlərdə dəqiqləşəcək.