Ana səhifə Planet |
Türkiyə və İsrailin baş nazirləri iki ölkə arasında ötən gün Romada baş tutan görüşdə əldə olunan razılıqlarla bağlı açıqlamalar veriblər.
Axar.az xəbər verir ki, qardaş ölkənin Baş naziri Binəli
Yıldırım iki ölkə arasında razılaşmanın artıq paraflandığını, sabah
Türkiyə Xarici İşlər Nazirliyinin müşaviri ilə israilli həmkarı
arasında sənəd imzalanacağını bildirib.
APA-nın məlumatına görə, imzalanmadan sonra
sənəd Türkiyə Böyük Millət Məclisi və müvafiq olaraq İsrail
Nazirlər Kabineti tərəfindən ratifikasiya olunacaq, bununla da iki
ölkə arasında münasibətlərin normallaşması prosesi rəsmən başlamış
olacaq.
"Sənəd ratifikasiya olunandan sonra hər iki ölkənin səfirlərinin
fəaliyyəti aktivləşdiriləcək. 2010-cu ildən başlayan böhranın
həllinin bu qədər uzun sürməsinin səbəbi Fələstinlə əlaqədardır.
Biz Fələstin məsələsində də nəticələr əldə olunmasının tərəfdarı
olmuşuq. Razılaşmada da bununla bağlı müddəlar var. Əsas
məsələlərdən biri Qəzzanın su və elektirk enerjisi ilə
təchizatıdır. İsrail bu müddəaya razılığını bildirib.
Razılaşmaya əsasən, İsrail "Mavi Mərmərə" gəmisində həyatını itirən
Türkiyə vətəndaşlarının ailələrinə ümumilikdə 20 milyon dollar
təzminat ödəyəcək. Bu razılaşma ilə Fələstinə tətbiq olunan embarqo
böyük ölçüdə aradan qaldırılacaq. Bununla yanaşı, iyulun 1-də 10
min ton humanitar yardım daşıyan Türkiyə gəmisi İsrailin Aşdod
limanı istiqamətində hərəkət edəcək. Qəzzada inşa olunan
Türkiyə-Fələstin xəstəxanasının açılışı üçün lazımi addımlar
atılacaq.
Normallaşma əlaqələrimizin bütün sahələrinə təsir edəcək. Lakin
əsasən iqtisadi əlaqələr və regional inkişafı əhatə edəcək. Əsas
məqsəd Qəzzada insanların rahat nəfəs alması və rahat yaşamasıdır.
Biz bununla sonuna qədər Fələstin xalqının yanında olduğumuzu
ortaya qoyduq", - Yıldırım bildirib.
Baş nazir razılaşmasının üç əsas məqsədini bir daha diqqətə
çatdırıb:
"Razılaşma sənədi üç məsələ baxmından əhəmiyyətlidir. Birincisi,
"Mavi Mərmərə" məsələsinə görə İsrailin Türkiyədən üzr istəməsi,
ikincisi, gəmidə həlak olmuş Türkiyə vətəndaşlarına təzminat
ödəməyə razılıq verməsi, üçüncüsü isə, Fələstinə tətbiq olunmuş
embarqonun yumşaldılmasıdır".
Bundan başqa, razılaşmada İsrail qazının Türkiyə üzərindən Avropa
nəqli də əksini tapıb.
İsrailin Baş naziri Benyamin Netanyahu isə Romada keçirdiyi
mətbuat açıqlamasında Ankara-Tel-Əviv arasında münasibətlərin
normallaşmasının Yaxın Şərqdə stabilləşməyə yardım edəcəyini
bildirib.
O deyib ki, razılaşma Qəzzaya humanitar yardımların edilməsini
nəzərdə tutur və bu, İsrailin marağındadır. Baş nazir qeyd edib ki,
Türkiyə ilə razılaşmadan sonra da Qəzzaya tətbiq olunan dəniz
blokadası davam edəcək.
B.Netanyahu əlavə edib ki, razılaşma Türkiyə ərazisindən İsrailə
qarşı ola biləcək istənilən terror fəaliyyətinin qarşısını alacaq.
"Bundan başqa, İsrail qazının Türkiyədən keçməklə, Avropa nəqli də
razılaşmada əksini tapıb", - deyə o vurğulayıb.
Tarix
2016.06.27 / 14:55
|
Müəllif
Axar.az
|