Ana səhifə Gündəm |
Türkiyə-Rusiya barışığı Cənubi Qafqazın xeyrinədir.
Axar.az xəbər verir ki, bu haqda politoloq Elxan Şahinoğlu yazıb. O bildirib ki, Türkiyə ilə Rusiyanı yaxınlaşdıran daha bir səbəb ABŞ və Avropa Birliyi ilə münasibətlərdəki soyuqluq idi:
"ABŞ və AB Krımın işğalı və Donbas separatçılarına verdiyi dəstəyə görə Rusiyaya qarşı sanksiyaların vaxtını uzadıb. Türkiyə isə AB-nin verdiyi vədin əksinə olaraq viza məsələsini həll etmədiyinə görə Brüsseldən narazıdır. ABŞ-ın Suriyadakı silahlı kürd qruplaşmalara dəstəi də Ankaranı narahat edir. Belə bir geosiyasi şəraitdə Türkiyə-Rusiya yaxınlaşmasnın alternativi qalmadı. Bundan sonra Rusiyada Türkiyə əleyhinə olan ritorikanın dəyişməsinə ehtiyac var. Əslində, Ankara İsraillə olduğu kimi, Kremllə də münasibətlərin normallaşması üçün 9 maddədən ibarət yol xəritəsi üzərində işləyirdi".
Politoloq Türkiyə-Rusiya yaxınlaşmasının Azərbaycanı milli maraqlarına cavab verdiyini qeyd edib:
"Türkiyə Azərbaycanın strateji müttəfiqi, İsrail və Rusiya isə strateji tərəfdaşlarıdır. Türkiyə Baş naziri Binəli Yıldırımın bu işdə Azərbaycanın rolunu etiraf etməsi təsadüf deyil. Türkiyə-Rusiya barışığı birbaşa Dağlıq Qarabağ münaqişəsinin ədalətli həllini sürətləndirməsə də, iki dövlətin yenidən əməkdaşlığa başlaması Cənubi Qafqazda müsbət atmosfer yaradacaq".
Qeyd edək ki, Türkiyə Prezidenti Rəcəb Tayyib Ərdoğan ötən gün rusiyalı həmkarına məktub yazaraq, Su-24 hadisəsinə görə təəssüfləndiyini, iki ölkə arasında münasibətlərin normallaşdırılması üçün heç vaxt diplomatik kanalları bağlamadığını bildirib. Bu gün isə Rusiya prezidenti ilə Türkiyə prezidenti arasında isti münasibətlərə qayıdış vəd edən telefon görüşməsi baş tutub.
Tarix
2016.06.29 / 18:57
|
Müəllif
Aygün Yusibova
|