Avtomobil yürüşü üzrə Formula-1 dünya çempionatının Yaponiyada keçirilən Qran-Pri mərhələsi başa çatıb.

Axar.az xəbər verir ki, "Mersedes"in britaniyalı pilotu Lüis Hemilton 53 dövrəlik mübarizənin yekununda finiş xəttini birinci keçərək yarışın qalibi olub. Bununla Hemilton karyerası ərzində 71-ci qələbəsini qazanıb. Onun finlandiyalı komanda yoldaşı Valtteri Bottas finişə ikinci çatıb. "Red Bull" pilotu Maks Ferstappen üçüncü pillədə qərarlaşıb.

Dünya çempionatının növbəti Qran-Pri mərhələsi oktyabrın 19-21-də ABŞ-da keçiriləcək.

Qeyd edək ki, Lüis Hemilton bundan əvvəl Rusiyada keçirilən yarışda da birinci olmuşdu.