Ana səhifə Gündəm |
Gənclərlə bağlı müntəzəm maarifləndirmə tədbirləri
həyata keçirən İRƏLİ İctimai Birliyi Avropa Oyunlarından öncə
hazırlanmış konsepsiya əsasında ərsəyə gələn SAY (Support of
Azerbaijan Youth) hərəkatının növbəti tədbirini
reallaşdırıb.
Axar.az xəbər verir ki, Azərbaycan Respublikası Prezidenti yanında
QHT-lərə Dövlət Dəstəyi Şurasının dəstəyi və İRƏLİ İctimai
Birliyinin təşkilatçılığı ilə SAY hərəkatının üçüncü fəaliyyəti
çərçivəsində təşkil olunan düşərgədə gənclər açıq havada qurulan
yaşayış çadırlarında qalaraq, bir sıra multikultural dəyərlərin
təbliği ilə bağlı təlimlərdə, ictimai müzakirələrdə iştirak edərək
öz bilik və bacarıqlarını inkişaf etdirib, həmçinin təşkil olunan
səmti müəyyən etmə, dağçılıq və s. ekstrim idman növləri üzrə
yarışlarda özlərini sınayıblar.
Qeyd edək ki, İRƏLİ İctimai Birliyi tərəfindən həyata keçirilən SAY
hərəkatı ilk tədbirini Avropa Oyunlarına dəstək istiqamətində
könüllülərin dəstəyi üçün, ikinci tədbirini ekoloji sahədə
gənclərin maarifləndirilməsi sahəsində həyata keçirib.
İRƏLİ İctimai Birliyi tərəfindən təşkil olunan "SAY:
Multikulturalizm" layihəsinin ilk günündə gənclərə "Komanda işi və
stereotiplərdən necə azad olmalı" mövzusunda təlim keçirilib.
İştirakçılar dağa dırmanma ekstrimal idman növundə özlərini
sınamış, həmçinin "İntellektual Multikulturallar" oyununda iştirak
ediblər.
İRƏLİ İctimai Birliyi tərəfindən təşkil olunan "SAY:
Multikulturalizm" layihəsinin növbəti günü gənclər
"Multikulturalizm və dinləri necə yaşayaq" təlimində iştirak
ediblər. Həmçinin Azərbaycan Respublikası Səmti Müəyyən Etmə
Federasiyası tərəfindən təşkil olunan təlimlərdə iştirak edərək
"Atlet və qaçış", "Xəritə və kompas" mövzularında praktiki
biliklərə yiyələniblər. Günün sonunda iştirakçılara öz bilikərini
tətbiq etmək üçün praktiki hissə keçirilib.
Daha sonra gənclərə "Multikultural cəmiyyətdə vətəndaş vəzifələri
və Azərbaycan çoxmillətli dövlət kimi" mövzusunda təlim keçirilib.
Eyni zamanda iştirakçılar Səmti müəyyən etmə oyununda yarışmış və
günün sonunda İvanovka kəndinə ekskursiya edərək buradakı
mədəni-əyləncəli proqramda iştirak ediblər.
Layihənin növbəti günündə iştirakçılar "Multikulturalizm Modeli"
Simulyasiya oyununda iştirak edərək öz bilik və bacarıqlarını
artırıblar.
Layihənin əsas məqsədi 2016-cı Multikulturalizm ili çərçivəsində
Azərbaycanda multikultural dəyərlərin aşılanması, vətəndaş
cəmiyyətinin düzgün istiqamətə yönləndirilməsi, gənclərdə humanizm,
tolerantlıq prinsiplərinin formalaşdırılması ilə demokratik mühiti
inkişaf etdirmək, dünya mədəniyyətinə inteqrasiyanı sürətləndirmək,
inteqrasiya fonunda Azərbaycan mədəniyyətinin dünya miqyasında
tanınmasına nail olmaqla milli-mənəvi dəyərlərimizin, tarixi
nailiyyət və abidələrimizin mənfurlar tərəfindən öz adına
çıxarmağın qarşısını almaqdan ibarətdir. Düşərgə
25.07.2016-30.07.2016 tarixlərində İsmayıllı rayonunda həyata
keçirilib.
Düşərgə proqramında film gecəsi, iməcilik, intellektual oyunlar,
ictimai müzakirə və müxtəlif əyləncələr həyata keçirilib. Qeyd edək
ki, düşərgədə qaldıqları müddətdə 14 regiondan 100 nəfərdən çox
gənc 8 komandaya bölünərək komandalarının qalibiyyəti uğrunda
mübarizə aparmış və müxtəlif göstəricilər üzrə
qiymətləndirilmişdir. Sonda qalib komandalar İRƏLİ İctimai Birliyi
tərəfindən mükafatlandırılıb. Düşərgənin bağlanış mərasimi
gənclərin təltifləndirilməs ilə sonlanıb.
Tarix
2016.08.01 / 19:37
|
Müəllif
Axar.az
|