Bakı görüşünün əsas məqsədi məhz elə Yaxın Şərq, əsasən də Suriya və İraq məsələsinə müəyyən aydınlıq gətirməkdən ibarət idi.

Bu sözləri Axar.az-a açıqlamasında politoloq Arzu Nağıyev deyib. Ekspertin sözlərinə görə, Bakıda Moskva və Vaşinqton arasında xüsusən də Yaxın Şərqlə bağlı iki mühüm razılıq əldə olunub:

“Bakı görüşünün əsas məqsədi məhz elə Yaxın Şərq, əsasən də Suriya və İraq məsələsinə müəyyən aydınlıq gətirməkdən ibarəti idi. Məhz bu görüşün nəticələrinin nədən ibarət olmasını aydınlaşdırmaq üçün hətta Astanada Suriya ilə bağlı tədbir bir günlüyünə təxirə salındı. Tərəflər arasında iki məsələdə anlaşmanın olduğu dəqiqdir.

Birincisi, Bakı görüşündə Yaxın Şərq ilə bağlı konkret qərarın olmasını gözləmək düzgün olmazdı, sadəcə, müəyyən əməliyyatlarda terrora, o cümlədən İŞİD-ə qarşı birgə tədbirlərin keçirilməsi də razılaşdırıla bilərdi.
İkincisi, zənnimcə, generalların Türkiyənin bir NATO üzvü kimi Suriyada apardığı əməliyyatlara Rusiya-Türkiyə münasibətləri kontekstindən də baxdığı istisna edimir. Təbii ki, ABŞ üçün vacib məsələ İranın regionda rolu və İsrailin mövqeyi də qeyd edilməlidir”.

Qeyd edək ki, iki gün öncə Bakıda ABŞ-ın Silahlı Qüvvələrinin Baş Qərargah rəisi Cozef Danford və Rusiya Silahlı Qüvvələrinin Baş Qərargah rəisi Valeri Gerasimovun görüşü baş tutub.