31 Mart Azərbaycanlıların Soyqırımı Günü ərəfəsində dörd lənkəranlı gənc Astara sərhədindən Xaçmaz sərhədinə kimi velosipedlə 760 km məsafə yol qət ediblər.

Axar.az xəbər verir ki, gənclər veloyürüş zamanı Quba Soyqırımı Memorial Kompleksini də ziyarət edib, burada yaradılan muzeylə tanış olublar.

1918-ci ildə Azərbaycanın bir çox yerində olduğu kimi Quba sakinlərinin də başına gətirilən müsibətlərin bariz nümunəsi olan kütləvi məzarlıq lənkəranlı gəncləri kədərləndirib.

Qeyd edək ki, “Sərhəddən-sərhədə” adlanan layihə Azərbaycan Prezidenti yanında Gənclər Fondunun maliyyə dəstəyi, Azərbaycan Velosiped İdmanı Federasiyası və Gənclər üçün Təhsil Mərkəzinin tərəfdaş təşkilatçılığı ilə ərsəyə gəlib. Layihə rəhbəri Tərlan Zülfiqarov olan veloyürüş Azərbaycanın cənub sərhədi Astaradan şimal sərhədi Xaçmaza kimi olan məsafəni əhatə edib.