Fransada seçkilərlə bağlı proqramı izləyirəm. Marin Le Penin və partaiyasının bu qədər güclənməsi təkcə Avropaya deyil, bütün dünyaya mesajdır.

Axar.az xəbər verir ki, bu sözləri millət vəkili Qənirə Paşayeva Fransada prezident seçkilərinin birinci turunun ilkin nəticələrinə münasibət bildirərkən yazıb. O qeyd edib ki, Fransada radikallar güclənir:

“Əslində, Avropanın əksər ölkələrində radikallar güclənir... Avropada müsəlmanlara, o cümlədən türklərə qarşı aqressiv mövqedə olanların güclənməsi təəssüf və ciddi narahatlıq doğurur. Bütün Avropa və dünya üçün yaxşı heç nə verməyəcək gərginlik artacaq”.

Qeyd edək ki, Marin Le Pen ultrasağçı liderdir. O, miqrantlara qarşı kəskin mövqeyi ilə seçilir. Fransanın AB-dən çıxması üçün hər şeyi edəcəyini bildirən yeganə prezidentliyə namizəddir.

Hazırda səslərin 50 faizdən çoxu sayılıb və Le Pen 24,1 faizlə liderlik edir.

Le Pen həmçinin erməni sevgisi ilə seçilir. O, “Dağlıq Qarabağı Ermənistana birləşdirilməklə, bu problemi həll etmək olar” deyə beynəlxalq hüququ heçə sayan açıqlaması ilə məşhurdur.

7 mayda keçiriləcək seçkilərin ikinci turunda Le Penin rəqibi Makrona məğlub olacağı proqnozlaşdırılır. Belə ki, ikinci tura keçməyən namizədlərin bir çoxu artıq Makronu dəstəklədiyini açıqlayıb.