Təbriz, Azərşəhr və Üskünün İran parlamentindəki millət vəkili Məhəmməd İsmayıl Səidi pensiya fondlarının mövcud durumu, bank sistemi, sərmayə yatırımı, Urmiya gölü ətafında kənd təsərrüfatı ilə məşğul olan əhalinin su sıxıntısı kimi problemlərdən danışıb.

Axar.az xəbər verir ki, o parlamentdə keçirilən ümumi iclasda çıxışı zamanı ölkə prezidenti Həsən Ruhaniyə müraciət edib:

“Bank sistemində ciddi islahata ehtiyac var. Bu barədə layihə ən qısa zamanda parlamentə təqdim olunmalıdır. İslahat, istehsal sahəsində olan maneləri aradan qaldırmaq və bölgədə sərmayə yatırımına şərait yaratmaq qaçılmazdır. Vəziyyətin belə davam edəcəyi təqdirdə daxili istehsal ağır bank faizlərindən iflic olacaq”.

Məhəmməd İsmayıl Səidi pensiya fondlarının fəaliyyətini də sərt tənqid edib. O bildirib ki, dəfələrlə təqaüdə çıxanların pensiyasının artırılması və uyğunlaşdırılması barədə söz verilib, lakin bu istiqamətdə heç bir addım atılmayıb.