"Qərbin yeganə çıxış yolu potensial partnyor, yaxın tərəfdaş kimi Azərbaycanı dəstəkləməkdir".

Bu sözləri "Axar.az"a açıqlamasında politoloq Ərəstun Oruclu Müdafiə naziri Zakir Həsənovun ABŞ Müdafiə katibi ilə görüşünü şərh edərkən deyib.

O, Qərbin Azərbaycana yönəltdiyi mesajların konkret olduğunu bildirib:

"ABŞ və Fransanın Azərbaycana yönəlik mesajları kifayət qədər konkretdir. Bu, birincisi Avrasiya İttifaqı ilə bağlıdır. Azərbaycanın müxtəlif basqılar və ya şirnikləndirici təkliflərlə bu birliyə qoşulması Rusiya tərəfindən nəzərdə tutulur. Rusiya müxtəlif cəhdlər edir ki, buna nail olsun. Ona görə də Ermənistanla müttəfiq olmağına baxmayaraq, Azərbaycana silah satır. Buna görə də Qərb çalışır ki, Azərbaycana alternativ təkliflər versin. Qərbin bu mənada manevr imkanları daha çoxdur. Çünki Ermənistan artıq faktiki olaraq öz seçimini edib. Bundan sonra Qərb mesajlarında Ermənistanı nəzərə almaya bilər. Belə olan halda Qərbin yeganə çıxış yolu potensial partnyor, yaxın tərəfdaş kimi Azərbaycanı dəstəkləməkdir. Azərbaycanın yeganə uduzacağı şey Rusiyadan ediləcək təzyiqlər olacaq. Rusiya onsuz da təyziqlər edirdi. Bu gün Azərbaycanın siyasətində iki amilin şahidi oluruq. Bir tərəfdən deyirik ki, Rusiya Azərbaycana silah verir, digər tərəfdən isə ən müxtəlif formalarda qapalı və açıq təzyiqlər edir. Qərbin bu məsələlərinin arxasında ilk növbədə Azərbaycanı öz sıralarında görmək istəyi dayanır".

Politoloq Azərbaycanın hazırda mövqe araşdırması etdiyini söyləyib:

"Zakir Həsənov ABŞ-ın Müdafiə katibi ilə görüşməzdən qabaq Mosvkvaya da, İrana da getdi. Güman edirəm ki, bu, haradasa mövqe araşdırmalarıdır. Təbii prosesdir. Gürcüstan və ABŞ-dakı görüşləri Qərbə mesaj kimi şərh etmək birtərəfli olardı. Azərbaycanın mənafeyinə uyğun addımlar atılmalıdır. Amma bu mənafe o demək deyil ki, Qarabağı əldə etmək naminə ölkə ərazisində ya Rusiya, ya da NATO-ya hərbi baza yaratmaq imkanı verilsin. Çünki istənilən halda bu, müstəqilliyin məhdudlaşdırılmasıdır. Ölkənin ərazisində xarici hərbi qüvvənin olması ölkənin maraqlarına xidmət göstərmir. Azərbaycanın hərbi doktrinasında da bu göstərilib ki, ölkə ərazisində xarici ölkələrin hərbi bazaları ola bilməz. Mənə elə gəlir ki, Azərbaycan mütləq seçim etməli olacaq. Artıq maraqların toqquşması pik həddə çatıb. Şübhəsiz ki, toqquşan tərəflərin arasında qalmaq bizə heç nə verməyəcək. Artıq balanslı siyasət yoxdur. Bu yalnız o zaman mümkün idi ki, heç bir mövqe tələb olunmasın".

Qeyd edək ki, bu gün Azərbaycanın Müdafiə naziri Zakir Həsənovun ABŞ-ın Müdafiə katibi Çak Heygel ilə görüşü planlaşdırılır.