"Generalın bu şəkildə savadsızlığı adamı heyrətə gətirir".

Bu sözləri Axar.az-a hərbi ekspert Üzeyir Cəfərov general-mayor Mahmud Həmzəyevin Publika.az-a verdiyi son müsahibəni şərh edərkən deyib.

O, Mahmud Həmzəyevin verdiyi müsahibə ilə öz nüfuzunu zədələdiyini bildirib:

"Mən ümumiyyətlə düşünürəm ki, bəzi şəxslər general rütbəsi daşıdıqları üçün danışıqlarına, oturuş-duruşlarına fikir verməlidir. Qarşıdan Silahlı Qüvvələr günü gəlir. Çox istərdim ki, yeni general rütbəsinə təqdim olunan şəxslərin siyahısına bir daha baxılsın. Jurnalist ondan Şahin Sultanovu soruşur. Mahmud Həmzəyev isə deyir ki, o hara, mən hara. Axı, bu nə deməkdir? İkisi də Müdafiə Nazirliyində xidmət keçib. Generalın bu şəkildə savadsızlığı adamı heyrətə gətirir. Ona görə də məsləhət görərdim ki, az danışsınlar".

Hərbi ekspert Mahmud Həmzəyevin qanun qarşısında cavab verməsinin mütləq olduğunu söyləyib:

"Bu adam vaxtilə etdiyi əməllərə görə mütləq mənada cavab verməlidir. Əgər o fikirləşirsə ki, təqaüddə oturmaqla canını qurtaracaq, o zaman yanılır. Gec-tez Mahmud Həmzəyevə qarşı müəyyən suallar yaranacaq. Bu suallara da o cavab verəcək. Mahmud Həmzəyevlə bağlı o qədər məsələ var ki, əgər bunlar araşdırılsa, tezliklə o da istintaqa cəlb olunacaq".

Qeyd edək ki, general Mahmud Həmzəyev bu gün "Publika.az" saytına verdiyi müsahibəsində onun həbsi haqqında xəbər yazan və yayan şəxsləri təhqir edib. Jurnalistin cəbhə xəttindəki vəziyyətlə bağlı verdiyi suala isə general "mənim heç nədən xəbərim yoxdur. Heç bununla maraqlanmıram da" cavabını verib.

Onu da xatırladaq ki, Mahmud Həmzəyev ordudan təxris olunana qədər Beyləqan hərbi birləşməsinin rəhbəri olub. O 2009-cu ildə SQ-dən təxris olunaraq təqaüdə göndərilib.