Azərbaycanın Böyük Britaniyadakı səfiri Fəxrəddin Qurbanov diaspor nümayəndələrimizin Londondakı Azərbaycan Evində təşkil etdikləri vida mərasiminə qatılıb.

Bu barədə Axar.az-a Azərbaycan Evinin əməkdaşı, həmkarımız Vüsal Həmzəyev məlumat verib. Onun sözlərinə görə, vida mərasimi səfirin şərəfinə keçirilib və onun fövqəaldə və səlahiyyətli səfir kimi fəaliyyət dönəminin başa çatması ilə bağlıdır. Görüşdə Londonda yaşayan və çalışan azərbaycanlılar, qadın təşkilatının üzvləri iştirak edib.

Xatırladaq ki, bir müddət əvvəl səfir F.Qurbanov Axar.az-a müsahibəsində Azərbaycan üçün çox darıxdığını vurğulamışdı:

"Azərbaycan üçün burnumun ucu göynəyir. Orada yaşlı anam, bacım, qardaşım, qohum-əqrəbalarım və dostlarım var. Azərbaycanda olanda ölkənin hər bir bölgəsinə gedirəm. Cənuba, şimal-qərbə… Azərbaycanın təbiətinə vurğunam. Bir çox ölkələrdən fərqli olaraq, bizim ölkəmizdə hələ də tam təbiiliyini qoruyub-saxlamış yerlər var".

F.Qurbanovun xələfinin kim olacağı və onun ölkəyə nə vaxt dönəcəyi ilə bağlı məlumat yoxdur.