Yelk Partiyası Ermənistan parlamentində kiçik bir fraksiya olduğundan bu ölkənin Avrasiya İttifaqından çıxması üçün yetərincə səs toplama ehtimalı olduqca zəifdir.

Bu sözləri Axar.az-a açıqlamasında Ermənistan parlamentində bu ölkənin Avrasiya İqtisadi Birliyindən çıxmasını özündə ehtiva edən qanun layihəsinin müzakirəsi ilə bağlı danışan sabiq dövlət müşaviri Qabil Hüseynli deyib. Politoloq bildirib ki, Ermənistanın Avrasiya İttifaqından çıxmaq imkanları zəif olsa da, burada bir cəhət xüsusilə diqqət çəkir:

“Ermənistanın AİB-dən çıxmaq və Qərb dünyasına, xüsusilə, Avropa Birliyi və onunla bağlı olan qurumlara inteqrasiya etmək əhval-ruhiyyəsi hər gün bir az da artır. Yəni bu məsələnin parlament səviyyəsinə çıxarılmasının özü çox böyük hadisədir. Bu o deməkdir ki, sıravi ermənilərin şüurunda bu məsələ geniş kök salıb və getdikcə özünə daha çox tərəfdar toplamaqdadır. Ancaq Rusiya bu məsələ ilə bağlı Ermənistanı daim təhdid edir və İrəvana bütün yardımları kəsəcəyini bildirir. Ermənistan ərazisində Rusiyanın iki hərbi bazası var və ölkənin sərhədləri də rus qoşunları tərəfindən qorunur. Üstəlik, Rusiyanın Ermənistanda hərbi-siyasi iştirak səviyyəsi kifayət qədər yüksəkdir. Bu iki faktor sözügedən qərarın qəbul edilməsini müşkül edir. Bir sözlə, bu məsələ getdikcə genişlənən bir hərəkata çevrilsə də, hələ bir müddət bunu reallaşdırmaq xeyli çətin olacaq. Bu fonda qarşıda İrəvanı çox gərgin günlərin gözlədiyini və hakimiyyət böhranının dərinləşəcəyini söyləmək mümkündür”.