Azərbaycandakı tolerantlıq və sabitlik digər ölkələrə nümunədir.

Axar.az xəbər verir ki, bu fikri Mərakeşin Azərbaycandakı səfiri Məhəmməd Adil Embarş Azərbaycan Dövlət İqtisad Universitetində (YUNEK) tələbələrlə görüşdə deyib.

Tarix, mədəniyyət və dünyəvi dəyərlər baxımından iki ölkənin xalqları arasında paralellər olduğunu bildirən səfir əməkdaşlığın perspektivlərindən danışıb. Diplomat Mərakeşin coğrafiyası, zəngin tarixi, təbiəti, iqtisadiyyatı, təhsil imkanları haqqında tələbələrə məlumat verib.

Səfir YUNEK-in zəngin infrastrukturunun olduğunu qeyd edib. O, beynəlxalq arenada gündən-günə nüfuzu artan YUNEK-in təhsil imkanlarını, tələbələrin intellektual səviyyəsini yüksək qiymətləndirərək onlarla tanışlıqdan şad olduğunu və Mərakeş ali təhsil müəssisələri ilə əməkdaşlığın qurulmasında kömək edəcəyini bildirib.

Azərbaycanda səfir kimi fəaliyyət göstərməkdən məmnun olduğunu vurğulayan diplomat YUNEK tələbələrinin Mərakeşin ali təhsil sistemi, mübadilə şərtləri, müsəlman ölkəsi kimi özəllikləri, turizm imkanları ilə bağlı suallarını cavablandırıb.