Akademik Zərifə Əliyeva adına Milli Oftalmologiya Mərkəzinin rəhbərliyinə, ilk növbədə mərkəzin direktoru Elmar müəllimə təşəbbüsümüzü dəstəkləyərək Mərkəzin Səyyar Klinikasını Tovuz rayonuna göndərdiyi üçün təşəkkür edirəm.

Axar.az xəbər verir ki, bu sözləri millət vəkili Qənirə Paşayeva paylaşıb. Q.paşayeva bildirib ki, artıq 3-cü dəfədir Milli Oftalmologiya Mərkəzi onun təşəbbüsünü dəstəkləyərək Səyyar Klinikasını Tovuza göndərir və göz əməliyyatına ehtiyacı olan xəstələr yerindəcə yüksək səviyyədə əməliyyat olunur, onlarla insan peşəkar mütəxəssislər tərəfindən müayinə edilir, onlara müalicələr yazılır və ya lazımı məsləhətlər verilir:

“Bu dəfə də sakinlərimizə yüksək səviyyədə tibbi dəstək göstərilib. Əməliyyata ehtiyacı olan xəstələrimiz yerində əməliyyat olunub, onlarla insanımız yüksək səviyyədə müayinədən keçib, müalicələr yazılıb və məsləhətlər verilib. Bir daha Akademik Zərifə Əliyeva adına Milli Oftalmologiya Mərkəzinin direktoru Elmar müəllimə, Yazgul Abdiyeva və aksiyada iştirak edən bütün dəyərli həkimlərə, tibb içlilərinə özümün və seçicilərimin adından təşəkkürümü bildirirəm”.