Ermənistanın Avropa İttifaqı ilə yaxınlaşmaqda yalnız bir məqsədi var, o da müstəqil olduğunu nümayiş etdirməkdir.

Bu sözləri Axar.az-a açıqlamasında politoloq, millət vəkili Rasim Musabəyov deyib.

“Görünür, İrəvanın bu şouya çox ehtiyacı var. Ancaq o da faktdır ki, Ermənistan hər hansı xarici siyasət yürütmək iqtidarında deyil və müstəqil qərar vermək səlahiyyətini çoxdan itirib. Ermənistan Avropa İttifaqı ilə tərəfdaşlığın genişləndirilməsinə dair müqavilə imzalamaq niyyəti güdsə də, Moskvanın xəbərdarlığından sonra İrəvanın sərgiləyəcəyi mövqe maraqlı olacaq”, - deputat qeyd edib.

Qeyd edək ki, noyabrın 24-də Brüsseldə “Şərq tərəfdaşlığı” sammiti keçiriləcək. Sammitdə Azərbaycan və Ermənistan dövlət başçılarının da iştirakı gözlənilir. Ermənistan AB ilə çərçivə sazişi imzalamağa çalışır. Brüsseldəki sammitdə qəbul ediləcək yekun qətnamənin 2-ci bəndində Şərq Tərəfdaşlığı ölkələrinin ərazi bütövlüyü tam dəstəklənir. Erməni ekspertlərinin fikrincə, Sərkisyan hakimiyyəti Moskvanın tələbləri qarşısında geri çəkiləcək və Avropa İttifaqı ilə saziş imzalamaqdan son anda imtina edəcək.