Ana səhifə Gündəm |
“Qarabağ-Azərbaycan” deyilərək yüzlərlə kanalda nümayiş olunan və ya reportajı yayımlanan bu oyunun Qarabağ həqiqətlərinin yayılmasındakı rolu o qədər böyükdür ki, onu anlatmağa ehtiyac yoxdur.
Axar.az xəbər verir ki, bu sözləri millət vəkili Qənirə Paşayeva bu gün keçirilən"Qarabağ"-"Çelsi" oyununun nəticəsinə münasibət bildirərkən qeyd edib. O bildirib ki, soyuq havaya baxmayaraq, əziz “Qarabağ”ın “Çelsi” ilə oyununu stadionda izləyib və komandanı dəstəkləyib:
“Qarabağ” çox gözəl oynadı. Bu oyunu “Çelsi” udmadı. Sadəcə, hakimlər “Qarabağ”ın uduzması üçün əllərindən nə gəirdilərsə, etdilər. “Çelsi”nin oyunu udmasına dəstək oldular. Penaltilər haqsız verildi, qırmızı vərəqə də... Amma “Qarabağ” 10 oyunçu ilə də çox yaxşı oynadı”.
Millət vəkili qeyd edib ki, açıqca hiss olunurdu ki, “Çelsi” oynadığı rəqibin güclü olduğunu hiss edir:
“Futboldan anlamayanlar deyə bilər ki, uduzduq. Amma futbolu bilənlər bilir ki, “Qarabağ”ın “Çelsi” kimi klublarla oynamağı nə deməkdir. Bu klubun büdcəsi “Qarabağ”la müqayisədə on dəfələrlə çoxdur. Azarkeşlərə təşəkkür edirəm. Sonuna qədər komandaya ruh verdilər və yanında oldular. Soyuq havaya baxmayaraq, onminlərlə insan stadionda “Qarabağ” üçün tək ürək idi. Uğurlar, “Qarabağ”. Hər zaman yanındayıq”.
Qeyd edək ki, bu gün UEFA Çempionlar Liqasının qrup mərhələsinin beşinci turunda Bakı Olimpiya Stadionunda “Qarabağ” “Çelsi” ilə qarşılaşıb. İngiltərə təmsilçisi görüşün nəticəsində 4-0 hesablı qələbə əldə edib.
Tarix
2017.11.23 / 00:25
|
Müəllif
Firuzə Vahidqızı
|