Ana səhifə Gündəm |
Trampın Qüdsü İsrailin paytaxtı elan etməsinin heç bir hüquqi əsası yoxdur.
Bu sözləri Axar.az-a açıqlamasında beynəlxalq hüquq üzrə professor, tanınmış politoloq Fərhad Mehdiyev ABŞ Prezidenti Donald Trampın az öncə Qüdsü İsrailin paytaxtı elan etməsi və səfirliyin ora köçürülməsi ilə bağlı Dövlət Departamentinə tapşırığını şərh edərkən deyib. F.Mehdiyevin sözlərinə görə, Trampın bu qərarı beynəlxalq hüquqa ziddir:
“Dövlətlərin çoxu Fələstini 1947-ci il sərhədləri daxilində tanıyıb. Bu səbəblə Qüdsün bir dövlətin sərəncamına verilməsi tanınmayacaqdır. Bu şəhərin xüsusi statusu olmalıdır, hər 3 səmavi din üçün müqəddəs şəhər sayılır”.
F.Mehdiyev bildirib ki, Fələstin buna görə ABŞ-ı beynəlxalq məhkəməyə verə bilməz, ancaq hər bir halda, bu qərarın heç bir hüquqi dəyəri yoxdur.
“BMT-nin 1947-ci il tarixdə qəbul etdiyi qətnaməyə görə, Fələstin o sərhədlər daxilində tanınıb. ABŞ-ın özü 1947-ci ildə Qüdsün xüsusi bir beynəlxalq rejimə tabe olacağına səs verib. Bu qərar BMT-nin Ümumi Assambleyasının səsverməsində 33 lehinə, 13 əleyhinə olmaqla qəbul edilib. Əleyhinə səs verənlər isə müsəlman ölkələri idi, çünki bu qərarla İsrail dövləti tanınırdı. Bu baxımdan Tramp beynəlxalq hüquq, həmçinin ABŞ-ın özünün səs verdiyi qətnamə əleyhinə bir qərar verib”, - F.Mehdiyev əlavə edib.
Tarix
2017.12.07 / 00:04
|
Müəllif
Aytac Araz
|