Dünya şöhrətli Azərbaycan alimi Rafiq Əliyev ABŞ-ın nüfuzlu "Dünya elmində ömürlük nailiyyət" ("Lifetime achievement award") mükafatına layıq görülüb.

Bu məlumatı Axar.az-a AMEA-nın müxbir üzvü, professor Rafiq Əliyevin özü təsdiqlədi. Bir ay əvvəl aldığı bu mükafatı bütövlükdə Azərbaycan elminə verilən yüksək qiymət kimi dəyərləndirən R.Əliyev bildirdi ki, ödül elm və incəsənət sahəsində təqdim olunur.

Özündən əvvəl bu yüksək ödülə məşhur azərbaycanlı alim Lütfi Zadənin layiq görüldüyünü xatirladan R.Əliyev qeyd etdi ki, bu mükafat ona qərar qəbuletmə nəzəriyyəsi, qeyri-səlis məntiqin inkişafında görülən işlər və soft-komputinq istiqamətində xidmətlərinə görə verilib.

Qeyd edək ki, "Dünya elmində ömürlük nailiyyət" ("Lifetime achievement award") ABŞ-da elmi nailiyyətlərə görə alimə verilən ən yüksək mükafatdır.