ABŞ-da federal hökumətin maliyyələşməsinin dayandırılması böyük bir faciə deyil.

Axar.az xəbər verir ki, bu sözləri iqtisadçı ekspert Natiq Cəfərli ABŞ hökumətinin fəaliyyətini dayandırmasına münasibət bildirərkən qeyd edib. O bildirib ki, Amerika tarixində 18 dəfə belə "shutdown" baş verib:

"Yəni bunun birbaşa Trampla əlaqəsi yoxdur. Sadəcə, hakimiyyət bölgüsü işləyən, icra-qanunverici-məhkəmə qolları normal olan ölkələrdə belə hadisələr siyasi danışıq və güzəştlər üçün şərait yaradır. Çox güman, yaxın bir neçə günə məsələ həll olunacaq, Federal hökumətin maliyyələşməsi yenidən bərpa ediləcək".

Ekspertin sözlərinə görə, həftənin ilk günü, çox güman, Türkiyə birjası və türk lirəsi ciddi dəyər itirəcək:

""Sıcak para" və xarici yatırımçılar türk lirəsində olan varlıqlarını sürətlə satıb, dollara, avroya çevirib ölkədən çıxarmağa başlayacaqlar".

Qeyd edək ki, ABŞ-ın bir sıra rəsmi dövlət idarələri maliyyə çatışmazlığı ucbatından fəaliyyətlərini qismən dayandırıblar. Buna səbəb ABŞ Konqresinin ölkənin federal büdcəsini qəbul edə bilməməsi olub.