Suriya ilə bağlı məsələlərdə Türkiyə ilə Amerika arasında müəyyən bir həmrəylik müşahidə olunur.

Bu sözləri Axar.az-a açıqlamasında sabiq dövlət müşaviri Qabil Hüseynli deyib. Politoloqun sözlərinə görə, ABŞ Dövlət katibi Reks Tillersonun Türkiyəyə səfərinin təfərrüatı gizli saxlanılsa da, Ankaranın Vaşinqtona bir sıra təkliflər irəli sürdüyü istisna deyil:

“Suriya ilə bağlı məsələlərdə Türkiyə ilə Amerika arasında müəyyən bir həmrəylik müşahidə olunur. Bunun da mahiyyəti ondan ibarətdir ki, Amerika Türkiyə sərhədlərinin təhlükəsizliyi prinspini qəbul edib və mümkün qədər əməliyyatları tez başa çatdırmağı xahiş edib”.

Politoloq bildirib ki, ABŞ və Türkiyə arasında Fətullah Gülənin ekstradisiyası məsələsində ciddi fikir ayrılıqları qalmaqdadır: “Amerika Gülən məsələsində güzəştə getmək fikrində deyil”.

Q.Hüseynli qeyd edib ki, Tillersonun Türkiyə səfəri əsnasında aparılan ətraflı fikir mübadiləsinin nəticələri olacaq:

“Birincisi, Amerika Türkiyəyə indiyə qədər satmadığı silahları verməyə hazırdır. İkincisi, hesab edirəm ki, Tillersonun Türkiyə səfərindən sonra Amerika Suriya ilə, Türkiyə isə Rusiya ilə bağlı məsələlərdə öz mövqeyini dəqiqləşdirəcək”.

Qeyd edək ki, ABŞ Dövlət katibi Reks Tillerson fevralın 15-də Türkiyəyə ikigünlük səfər edib.