Rusiya Baş Kəşfiyyat İdarəsinin sabiq polkovniki Sergey Skripal və onun qızı Yuliya Londonun ortasında “noviçok” adlı 3-cü nəsil, ancaq hərbdə istifadə edilən, Rusiyada istehsal olunmuş qazla zəhərləndirilməsi artıq ikinci belə hadisədir, bir neçə il öncə Aleksandr Litvinenkonu da Londonda “Polonium-210” ilə zəhərləyib öldürmüşdülər.

Axar.az xəbər verir ki, bu barədə ekspert Natiq Cəfərli qeyd edib. O bildirib ki, bu hadisədə Moskvanın əli olduğu sübut olunarsa, Kremlə bağlı olan, Britaniyada biznesi, daşınan-daşınmaz əmlak sahibi insanlar ciddi problemlə üzləşəcəklər:

“Rusiya ilə Britaniya arasında qızışmaqda olan qalmaqal Moskva üçün çox ağır nəticələrə səbəb ola bilər. Bir çox Rusiya məmurunun, Kremlə yaxın insanların övladları, yaxınları Britaniya vətəndaşıdırlar, onlarla da bağlı kəskin addımlar atıla bilər”.

Natiq Cəfərli onu da qeyd edib ki, Rusiya bu addımı ilə dünyaya mesaj verir:

“Moskvanın belə aqressiv, “publik”, görk olacaq qətllər etmə ehtimalı ciddi məsələdir, həm də ətraf ölkələrə mesajdır. Londonda belə addımlar atmağı bacaran bir ölkə öz yaxın ətrafında hər şey edə bilər. Məhz buna görə də ətraf ölkələrin siyasi elitaları Moskva ilə yumşaq davranmağa məcburdurlar. Belə davranışı anlamağa məcburuq”.

Dünyanın çox ağır, çətin, hətta dəhşətli bir qarşıdurma dövrünə qədəm qoyduğunu vurğulayan Natiq Cəfərli planetin siyasi elitasının davranışları və yanaşması ilə “oğru dünyasının” məntiqi arasında elə bir ciddi fərqin qalmadığını bildirib.

Qeyd edək ki, martın 5-də Rusiya Hərbi Kəşfiyyat İdarəsinin keçmiş polkovniki Sergey Skripal və onun qızı Yuliya huşsuz və ağır vəziyyətdə Britaniyada parkların birində tapılıb. İngiltərə Baş naziri Tereza Mey rusiyalı eks-kəşfiyyatçı Sergey Skripalın zəhərlənməsində Moskvanın məsuliyyət daşıdığını bildirib.