Prezident İlham Əliyev Milli Məclisdəki andiçmə məraisimində seçki kampaniyası zamanı namizədlərin səsləndirdiyi təkliflərə münasibət bildirib. Namizədlər tərəfindən səsləndirilən tənqidi fikirləri alqışladığını bildirən ölkə başçısı dəyərli təkliflərin hamısının nəzərə alınacağını vurğulayıb.

Bununla bağlı Axar.az-a acıqlama verən BAXCP funksioneri Niyaməddin Orduxanlı bildirib ki, Prezident İlham Əliyevin səsləndirdiyi bu fikirlər ölkədə siyasi mədəniyyətin inkişafı baxımından çox önəmlidir.

“Prezidentin seçki debatları zamanı namizəd olmuş şəxslərin səsləndirdiyi fikirlərə, təkliflərə baxılacağını qeyd etməsi təqdir olunmalıdır. Bilirsiniz ki, prezident seçkiləri bitəndən sonra İlham Əliyevi qalib gəlməsi münasibəti ilə ilk olaraq Qüdrət Həsənquliyev təbrik etdi. Qüdrət bəy Prezident İlham Əliyevə ölkəmizdə yaşanan problemlərin həllində, o cümlədən Azərbaycanın ərazi bütövlüyünün təmin olunmasında uğurlar arzuladı, prezidentin və komandasının digər namizədlərin seçki marafonu zamanı ölkədəki problemlərin həllinə dair səsləndirdikləri təklifləri diqqətlə araşdıracağına və lazımlı təkliflərdən faydalanılacağına ümid etdiyini dedi. Dünən isə prezident andiçmə mərasimində seçki debatları zamanı namizədlərin qaldırdığı məsələlərə diqqət ayrılacağını və dəyərli təkliflərin nəzərə alınacağını qeyd etdi. Qüdrət Həsənquliyev prezidentliyə namizəd kimi öz platformasını və ölkədə mövcud olan problemləri və bu problemlərin həlli yollarını təklif edirdi. Qüdrət bəyin səsləndirdiyi problemlərdən biri də şəhid ailələri üçün nəzərdə tutulan 11 000 manat vəsaitin verilməməsi idi. Qüdrət bəy bu vəsaitin verilməsinə dair Azərbaycan Respublikasının Konstitusiya Məhkəməsinin 28 yanvar 2014-cü il tarixli qərarının olmasını da qeyd etmişdi. Artıq bu gün cənab Prezident İlham Əliyevin ilk fərmanlarından biri həmin şəhid ailələrinə veriləcək 11.000 manatla bağlı idi. Düşünürük ki, sonuncu seçki marafonu zamanı prezidentliyə namizədlərin qaldırdığı məsələrə ölkə başçısının diqqət ayırması ölkəmizi siyasi inkişafın yeni mərhələsinə keçirməyə imkan yaradacaqdır", - N.Orduxanlı deyib.