Ermənistan Prezidenti Armen Sərkisyanın gözlənilmədən Rusiya səfəri bir çox sualların yaranmasına səbəb olub.

Axar.az xəbər verir ki, bu sözləri analitik Ehtiram Aşırlı deyib. O bildirib ki, növbədənkənar parlament seçkilərinin keçirilməsinin planlaşdırıldığı bir vaxtda A.Sərkisyanın Kremlə səfər etməsi ayrı bir məna kəsb edir:

"Bu səfəri, xüsusilə, Kremlin seçkilərə müdaxilə etmə ehtimalının yüksək olması ilə əlaqələndirə bilərik. Rusiya da “Qarabağ klanı” kimi Paşinyanın keçirməyi planlaşdırdığı növbədənkənar parlament seçkilərinə hazırlıqsız vəziyyətdə yaxalanıb. Bu səbəbdən hesab etmək olar ki, A.Sərkisyanın Rusiyaya səfərinin pərdə arxasında bu məsələ durur. “Qarabağ klanı”nın seçkilərdən kənarlaşdırılması Rusiyanı narahat edən amillərdən biridir".

Analitik qeyd edib ki, bu baxımdan Paşinyana qarşı yeni bir ssenarinin işə salındığını söyləmək olar:

“Ehtimal ki, A.Sərkisyan vasitəsilə “Qarabağ klanı”nın Ermənistan hakimiyyətindəki mövqeyini möhkəmlədib, Paşinyanın dayaqlarını zəiflətməyə çalışılır. A.Sərkisyanın Rusiyadan dönər-dönməz tez-tələsik işğal altında olan Azərbaycan torpaqlarına, Qarabağa səfər etməsi də bəhs etdiyimiz amillə əlaqələndirilməlidir. A.Sərkisyan buradakı “Qarabağ klanı” üzvləri ilə seçkilərlə bağlı mümkün ssenariləri müzakirə edə bilər".

Analitik vurğulayıb ki, Paşinyana qarşı “Qarabağ klanı”nın aktivləşdiyini xüsusilə 16 oktyabrda, baş nazirin istefasından sonra daha aydın müşahidə etmək olacaq.