Ermənistanda yeni hakimiyyət tərəfindən korrupsiya ilə mübarizədə ciddi addımların atılmasının növbəti illərdə vergi daxilolmalarının ÜDM-də payını artıracağı gözlənilirdi. Çünki əvvəlki hakimiyyətin dövründə vergidən yayınma halları və vergi yığımlarının təşkilində korrupsiya mövcud idi.

Axar.az xəbər verir ki, bu sözləri iqtisadçı ekspert Rəşad Bayram deyib. “Lakin bu ölkənin 2019-cu il üçün büdcə layihəsində vergi daxilolmalarının ÜDM-də xüsusi çəkisi gözlənilənin əksinə, 2017-ci illə müqayisədə 0,1 faiz bənd az, yəni 22,1% proqnozlaşdırılıb. Bu da Ermənistanın keçmiş baş naziri tərəfindən belə bir bəyanatın verilməsinə səbəb olub. O, növbəti il üzrə büdcə layihəsinin ölkənin yeni rəhbərliyi tərəfindən korrupsiya ilə mübarizədə heç bir ciddi addımı əks etdirmədiyini qeyd edib”, - ekspert bildirib.

Qeyd edək ki, Ermənistanın keçmiş baş naziri Qrant Baqratyan 2019-ci il dövlət büdcəsinin daha iri miqyaslı korrupsiya üçün nəzərdə tutulduğunu deyib. Sabiq baş nazirin sözlərinə görə, vergi göstəricilərinin ÜDM-ə nisbətən azalması praktiki olaraq onu göstərir ki, korrupsiyaya qarşı heç bir real mübarizə yoxdur.