Ana səhifə Gündəm |
Son günlər Ermənistanın Rusiya ilə münasibətlərinin də yaxşı olmadığını nəzərə alsaq, ölkənin yeni bir iqtisadi böhran və qeyri-sabitliklə qarşı-qarşıya olduğu ehtimalı çox yüksəkdir.
Bu sözləri Axar.az-a açıqlamasında professor Toğrul İsmayıl deyib. O bildirib ki, ABŞ-ın İrana tətbiq etdiyi sanksiyalar eyni zamanda İranla qonşu olan ölkələrə də öz təsirini göstərəcək:
“Amma burada əsas məsələ İranla olan ticarətin həcmi və əməkdaşlığın aparıldığı sahələrdir. Ermənistanın İranla ticarət əlaqələrinin həcmi böyük olmasa da, ABŞ-ın xüsusi həssaslıq göstərdiyi sahələri əhatə edir. Digər tərəfdən, Ermənistan Rusiya ilə də müttəfiqdir və Rusiya ilə də ticarət dövriyyəsi kifayət qədər çoxdur. Ümumiyyətlə, Ermənistan bölgədə antiamerika siyasətinə açıq şəkildə dəstək verə bilər. Bunun Ermənistan üçün hansı nəticələrə gətirib çıxaracağını proqnozlaşdırmaq çətindir”.
T.İsmayıl qeyd edib ki, bütün hallarda ABŞ-ın İrana qarşı sanksiyalarına Ermənistanın tamamilə tərəfsiz qalması imkansızdır:
“Və bu da Ermənistan iqtisadiyyatına ciddi şəkildə təsir göstərəcək. Yəni Ermənistan istər ABŞ-ın İrana qarşı tətbiq etdiyi sanksiyalara qatılsın, istər qatılmasın, bu sanksiyalar Ermənistan iqtisadiyyatına ciddi şəkildə mənfi yöndə təsir edəcək. ABŞ-ın bu sanksiyaları bölgədə olan hər kəsə təsir etsə də, Ermənistanın durumu daha da ağır olacaq. Amma Ermənistan onsuz da həddən artıq kasıb ölkədir. İqtisadi infrastrukturu olmayan bu ölkə xaricdən gələn - əsasən də Rusiyadan - pullarla ayaqda durmağa çalışır. Bu səbəbdən də yeni böhran olmayan iqtisadiyyatı dağıda bilməz və Ermənistan da buna görə ciddi narahat deyil”.
Tarix
2018.10.19 / 08:45
|
Müəllif
Firuzə Vahidqızı
|