Memorandumda da göstərildiyi kimi, Dağlıq Qarabağ məsələsinin həllində Belarus tərəfi kifayət qədər obyektivlik nümayiş etdirir.

Bu sözləri Axar.az-a açıqlamasında sabiq dövlət müşaviri Qabil Hüseynli deyib. O bildirib ki, Prezident İlham Əliyevin Lukaşenkoya Dağlıq Qarabağ münaqişəsinə olan münasibətinə görə təşəkkür etməsi təsadüfü deyildi:

“Beynəlxalq hüquq normaları əsasında məsələnin həll edilməsi elə Azərbaycanın ərazi bütövlüyü çərçivəsində problemin həlli deməkdir. Bu, demək olar ki, Belarusun Azərbaycana göstərdiyi ən böyük diqqət və siyasi dəstəkdir. Eyni zamanda, tipik obyektivlik nümunəsidir. Belarus MDB-də ilk dövlətdir ki, Azərbaycanın ərazi bütövlüyü məsələsinə bu səviyyədə obyektiv və qərəzsiz münasibət nümayişi ilə presedent yaratdı. Bu onu göstərir ki, Azərbaycanla Belarus arasındakı münasibətlər kifayət qədər yüksək inkişaf səviyyəsinə qədəm qoyub”.

Politoloq vurğulayıb ki, iki dövlət arasındakı münasibətin, İlham Əliyevin də dediyi kimi, təkcə MDB məkanında deyil, dünyada analoqu yoxdur:

“Bu münasibətlərin inkişaf tendensiyası da hər iki tərəfi qane edir. Yəni bütün ticarət, maşınqayırma sənayesi, kənd təsərrüfatı, hərbi sənaye kompleksinin inkişaf etdirilməsi və Belarusdan modern silahların alınması sahəsində iki ölkə arasında kifayət qədər ciddi əməkdaşlıqlar mövcuddur. Bu əlaqələrin gələcəkdə daha da inkişaf etdirilməsi nəzərdə tutulur. Məsələn, Belarus Azərbaycana “Polonez” və hava hücumundan müdafiə sistemlərinin yeni partiyasını yaxınlarda göndərəcək. İndiyə qədər isə Azərbaycana “Katyuşa” və “Smerç” tipli yaylım atəşi olan odsaçan silahlar və s. göndərib. Eyni zamanda, Azərbaycanda Gəncə Avtomobil Zavodunda MAZ markalı avtomobillərin yığılması və gələcəkdə istehsalını nəzərdə tutan layihələr həyata keçirir. Tərəflər arasında bir çox sahələrdə münasibətlər durmadan genişlənir”.