Gürcü Arzusu hökumətinin kredit borclarıyla bağlı qərarına əhali inanmayacaq.

Bu sözləri Axar.az-a açıqlamasında Gürcüstanın keçmiş müdafiə naziri, Vahid Milli Hərəkat Partiyasının liderlərindən olan Dmitri Şaşkin deyib.

“Bu qərarla bağlı iki məqam var: Birincisi, bu, seçkidə iştirak edəcək əhalinin satın alınması üçün göstərilən primitiv cəhddir. İkincisi, buna heç kim inanmır. Sizə xatırlatmaq istəyirəm ki, bu vədi Gürcüstana özlərinin “pulsuz pullar” adlandırdıqları faizsiz kreditləri vəd edən şəxslər verirlər. Onlar tariflərin, benzinin qiymətinin iki dəfə endirilməsinə, 100-ə yaxın zavodun tikilməsinə söz vermişdilər. Əvəzində isə heç bir iş görülmədi, ona görə də bu şəxslərə etibar səviyyəsi sıfra bərabərdir. Onların planı bu dəfə işləməyəcək, insanlar onlara sadəcə inanmırlar”, – deyə o bildirib.

Şaşkin açıqlaması zamanı seçkidən sonra Gürcüstanın götürəcəyi xarici siyasət kursuna da diqqət yetirib. Azərbaycanla hazırkı dövrdə olan münasibətlərə zərər vurulduğunu deyən Şaşkin onun ən azı Saakaşvili dövründəki səviyyəyə qaldırılması gərəkdiyini vurğulayıb:

“28 noyabrda Gürcüstan Azərbaycanla mehriban qonşuluq əlaqələrinin sadə bir şey olmadığını düşünən prezident seçəcək. Bizim üçün Azərbaycan və Türkiyə strateji tərəfdaşdır. Bu münasibətlər Gürcüstan üçün həyati əhəmiyyət daşıyır. Bizə sadəcə kağız üzərində, bəyanatlarda olan mehriban qonşuluq əlaqələri yox, real əməkdaşlıq lazımdır. Çox təəssüf ki, bu hökumət altı il ərzində münasibətlərə çoxlu zərər vurub. Məncə, 28 noyabrda Qriqol Vaşadze prezident seçilsə, o, hər şeyi edəcək ki, Azərbaycanla Gürcüstan arasında münasibətlər Mixail Saakaşvili dövründə olan səviyyəyə qalxsın və daha da dərinləşsin”.

Qeyd edək ki, Gürcüstan hökuməti 600 min nəfər insanın kredit borclarının bağlanılması məsələsini gündəmə gətirib. Belə ki, bu insanların borclarını milyarder Bidzina İvanişvilinin Kartu Fondu öz üzərinə götürüb.

İvanişvilinin addımı müxalifət tərəfindən xoş qarşılanmayıb. Bir sıra ekspertlər və müxalifət İvanişvilinin bu addımını seçkiyə təsir, əhalinin səslərinin satın almaq kimi dəyərləndirib. Bəzi iqtisadçılar isə bu qərarın iqtisadiyyata mənfi təsir edəcəyini bildirib.