ABŞ-la İran arasında ikincinin müəyyən taktiki silahları sınaqdan keçirməsinə görə çox ciddi gərginlik yaşanır.

Bu sözləri Axar.az-a açıqlamasında analitik Vüqar Zifəroğlu deyib. Analitik Vaşinqton və Tehran arasında yaşanan bu gərginliyin daha da artacağını istisna etməyib:

“ABŞ İrandan bu sınaqların dayandırılmasını tələb edir və yeni ballistik raket sınağının Avropa üçün təhdid olduğunu bildirir. İran isə orta mənzilli raketlərin istehsalı və sınaqdan keçirilməsi hüququna malik olduğunu düşünür. Hesab edirəm ki, bu, nəticə etibarilə ABŞ-ın İrana qarşı növbəti iqtisadi sanksiya dalğasına gətirib çıxaracaq. Yeni sanksiya dalğası isə İranın daxili iqtisadi problemləri fonunda ölkədə çox ciddi narazılıqlara yol aça bilər”.

Analitik hazırda İranın daxilində çox maraqlı proseslərin getdiyini deyib:

“Bu proseslər təkcə iqtisadi deyil, eyni zamanda, etnik narazılıqlarda da özünü göstərir. Əsasən, etnik ərəblər, kürdlər və bəlucların yaşadığı bölgələrdə silahlı toqquşmalar səngimir. Məsələn, SEPAH-ın dəstələrinə və sərhəd əsgərlərinə hücumlar edilir. Bütün bunlar isə öz növbəsində İranda etnik narazılıq baxımından kifayət qədər problemlərə yol açmış olur. ABŞ-ın İrana qarşı tətbiq edəcəyi sanksiyalar fonunda bu narazılıqların daha da artacağını düşünürəm. ABŞ hazırda bu istiqamətdə təzyiqlərini maksimum artırmağa çalışır. Bu isə İran üçün yaxşı heç nə vəd etmir”.

Qeyd edək ki, İran bir müddət əvvəl ballistik raketlərinin yeni sınağını keçirdiyini təsdiq edib.