"Qısa müddətli maraqlar üzərində qurulan münasibətlərin Cənubi Qafqazda Rusiya, İran və Ermənistan geopolitik xəttinə təsir edəcəyini gözləmək sadəlövhlükdür".

Axar.az xəbər verir ki, bu açıqlama ilə Türkiyədə yaşayan politoloq Orxan Qafarlı öz Feysbuk səhifəsində çıxış edib.

O, Rusiya ilə Türkiyə arasında isti münasibətlərin uzun müddətli olmadığını bildirib:

"Rusiya-Türkiyə münasibətlərində Putinin Ankaranı ziyarət etməsindən sonra aralarında yaranan isti münasibətləri uzunmüddətli görməmək lazımdır. Dünya siyasətində Qərblə Rusiya arasında yaşanan soyuq münasibətlər dolayısı yolla bu prosesi indiki məqamda təsirli edir. Bu yaxınlaşmanın hələ ki, uzun müddətli olması mümkün görünmür. Çünki Türkiyə NATO-nun üzvü və ABŞ-ın regionda önəmli müttəfiqidir. Rusiya bunları gözəl bilir. Hər iki dövlət, yəni Rusiya və Türkiyə indiki məqamda bir-birindən maksimum şəkildə faydalanmağa çalışırlar. Qısa müddətli maraqlar üzərində qurulan münasibətlərin Cənubi Qafqazda Rusiya, İran və Ermənistan geopolitik xəttinə təsir edəcəyini gözləmək sadəlövhlükdür. Cənubi Qafqazda Azərbaycan, Gürcüstan və Türkiyə geopolitik xəttinin daha sağlam iqtisadi, siyasi və hərbi əməkdaşlıq təməlləri var. Eyni zamanda, bu xəttə rəqib olan Rusiya-Ermənistan-İran xəttinin də siyasi, iqtisadi və hərbi əməkdaşlıq təməlləri mövcuddur. Ona görə də dünya siyasətində mimitik dəyişiklikləri uzun müddətli olaraq görmək doğru olmaz".