Üzümüzə gələn ildə dünya iqtisadiyyatında köklü dəyişikliklər baş verəcək.

Axar.az bildirir ki, "Qardian" ("The Guardian") qəzeti 2015-ci ildə bir çox ölkənin maliyyə-iqtisadi durumunun xeyli yaxşılaşmasına ümidlər olduğunu yazıb. Analitiklərin fikrincə, elə bu ümidlər də mövcud olan problemləri dərinləşdirə bilər.

Qəzet bir neçə risk faktorunun adını çəkib – neftin qiyməti, Rusiya və Ukraynadakı iqtisadi problemlər, Çin və Amerika iqtisadiyyatlarının durumu və Avrozonadakı böhranla mübarizə.

İddialara görə, qara qızılın qiymətinin enməsi bir tərəfdən istehlak tələbatına müsbət təsir göstərir və şirkətlərin xərclərini azaldır, digər tərəfdən isə qiymətlərin düşməsi Venesuela və İranın iqtisadiyyatına təsir edən, eləcə də ABŞ-ın enerji sahələrini batıran "kredit stressi" yaradır.

Rusiyanın iqtisadi vəziyyəti də neftin qiymətindən asılıdır. Əgər Rusiya yeni ildə iqtisadi çətinlikləri dəf edə bilməsə, bu, həm Rusiya, həm də Avropa Birliyi dövlətlərində öz təsirini göstərəcək.

Qəzetin yazdığına görə, 2015-ci ildə bütün diqqətlər dünya iqtisadiyyatının iki böyük gücünə - Çin və ABŞ-a yönələcək.