Türkiyədə konstitusiya dəyişikliyi üçün 330 səs kifayət edir. AKP əlavə 13 millət vəkilinin də səsini toplamaqla, konstitusiya dəyişikliyini həyata keçirə və referendumla bu işi həll edə biləcək.

Axar.az xəbər verir ki, bu barədə politoloq Fərhad Mehdiyev qardaş ölkədə 1 noyabr parlament seçkisindən sonra AKP-nin atacağı addımlarla bağlı danışarkən qeyd edib. O, Türkiyədə prezident üsul-idarəsi sisteminə nail olmaq üçün hakim partiyanın bu yolda atacağı üç mühüm addımı vurğulayıb:

"Görünən odur ki, əlavə 13 millət vəkilinin (AKP hazırda 317 millət vəkilinə sahibdir) səsini toplamaqla, konstitusiya dəyişikliyini həyata keçirmək mümkün olacaq. Maraqlısı isə AKP-nin bu 13 millət vəkilini necə əldə edəcəyidir. Burada 3 variant mümkündür və bunlardan biri mütləq baş verəcək. Birincisi, Dövlət Baxçalı bu dönəm ərzində çevrəsini yeni bir millətçi başqanın seçilməsi yolu ilə qələbəyə inandırmağa çalışacaq, ancaq bu səylər də heç bir nəticə verməyəcək. Belə olan halda isə təbii ki, özü də seçilməyəcək. Bir sözlə, Baxçalı istefa verməsə, ondan istifadə edəcəklər.

İkincisi, müxtəlif mənfəətlər müqabilində digər partiyalardan müəyyən adlar gətiriləcək.

Üçüncüsü, HDP ilə federal dövlət quruluşu barədə razılığa gələrək ona uyğun konstitusiya hazırlanmaqla referenduma gediləcək. Bu proses 2 ilə tamamlanacaq".

Qeyd edək ki, Türkiyədə keçirilən 1 noyabr parlament seçkisində AKP 49,38 faiz səs toplayaraq təkbaşına iqtidar olub. CHP 25,41, MHP 11,98, HDP 10,47%, digərləri isə 2,77% səs toplayıb.