İran-Səudiyyə qarşıdurması dini müstəvidə daha kəskin hal alarsa, bu, nəinki Yaxın Şərq, bütün islam dünyası üçün dəhşətə çevrilə bilər.

Bu barədə Axar.az-a açıqlamasında politoloq Fikrət Sadıqov bildirib. Onun sözlərinə görə, Yaxın Şərqdə baş verən gərginliyin mənfi nəticəsi kimi üzə çıxan Səudiyyə-İran qarşıdurmasının fəsadları çox ağır ola bilər:

"Bu proses Rusiya ilə Qərb arasında Suriya ətrafında baş verən hadisələrin geosiyasi vəziyyətini dəyişə və hazırkı vəziyyəti məcrasından çıxara bilər. Çünki Səudiyyə Qərbə arxalanır, ABŞ-ın müttəfiqidir. İran isə Rusiya ilə münasibətləri yaxın tutmağa çalışır. Moskva ilə Tehranın Suriyada məqsədləri demək olar ki, eynidir. Bəşər Əsəd rejimin müdafiəsi və bu kontekstdə digər bəlli qüvvələri məhv etməklə Suriyanı Qərbin əhatə dairəsindən tamamilə çıxarmaq hazırkı planın əsas hissəsidir. Səudiyyə-İran qarşıdurması çox təhlükəli bir tendensiyaya çevrilməkdədir. Çünki bu münaqişə regional siyasi qarşıdurmadan çıxaraq dini müstəviyə keçir. Proses kəskin hal alarsa, bu, nəinki Yaxın Şərq, bütün müsəlman aləmi üçün dəhşətə çevrilə bilər. Proses özlüyündə Suriya məsələsində də öz əksini tapa və Qərblə Rusiya arasındakı mövcud qarşıdurmanın daha ciddi hal almasına gətirib çıxa bilər. Ona görə beynəlxalq regional təşkilatlar bu təhlükənin qabağını almaq üçün hərəkətə keçməsələr, fəsadlar çox ağır olacaq".