Hər iki məsələ təcili həll edilməlidir.

Bunu Axar.az-a deputat Məlahət İbrahimqızı sənədləşməyən qanunsuz tikililərin sökülməsi və yeni binalarda yaşayanların hələ də mənzil şəhadətnaməsi ala bilməmələri haqda danışarkən deyib.

Onun sözlərinə görə, ölkə başçısı bir neçə il qabaq aidiyyəti icra strukturlarına müvafiq tapşırıqlar verib:

"Milli Məclisdə bu məsələyə baxılıb. Ona görə də həm Bakıda, həm bölgələrdə problem tezliklə həllini tapmalıdır. Bu məsələ həllini tapmayınca ciddi problemlər yaranır. Bəzi laqeyd məmurlar onların gözü qabağında tikilmiş evləri sökdürür. Bu da ciddi sosial narazılıq doğurur".

Deputat həmin evlər tikilərkən aidiyyəti qurumların niyə susduğunu da sual edib:

"Yeni tikilən binalara gəlincə, bu mənzillərdə də sənədləşmə aparılmayıb. Bəs niyə bu mənzillərdə yaşamağa icazə verilir? Sahibkarla aidiyyəti strukturlar arasındakı məsələnin vətəndaşa aidiyyəti yoxdur. Odur ki, məsələ həllini tapmalıdır".

M.İbrahimqızı "Dostluq parkı"nda onlarla villanın söküldüyünü xatırladıb:

"Bu villalara milyonlarla vəsait xərclənmişdi və həmin pullar havaya uçuruldu. Bəzən belə işləri vətəndaşlara izah etmək çətin olur".