Mən Azərbaycan dilində danışa bilmirəm. İstər dərimin rənginə, istərsə də dini etiqadıma görə sizin insanlardan çox fərqlənirəm. Amma hesab edirəm ki, kövrək duyğuları paylaşmaq üçün heç də hamının eyni dildə danışması vacib deyil. Elə ona görə də sizin azadlıq və müstəqillik yolunda şəhid olan vətəndaşlarınızın ruhuna hörmət əlaməti olaraq mən buraya - Şəhidlər Xiyabana gəlmişəm.

Bu sözləri AzərTac-a müsahibəsində Tanzaniya vətəndaşı, İspaniya Universitetinin doktorantı Msanya Dismas söyləyib.

Msanya Dismas deyib: İllər öncə azərbaycanlıların başına gətirilən 20 Yanvar faciəsi haqqında dünən eşitdim. Metronun 20 Yanvar stansiyasında olarkən gördüm ki, hər tərəfə çoxlu güllər düzülüb. Orada öyrəndim ki, azərbaycanlılar hər ilin 20 yanvarını milli hüzn günü kimi qeyd edirlər. 20 Yanvar faciəsi haqqında daha ətraflı məlumatı internetdən öyrəndim. Dünyada çox xalqlar olsa da, onların heç də hamısının müstəqil dövlətləri yoxdur. Mənim ölkəmdə sizin şəhidlərin məzarı üstünə qoyduğunuz güldən bitmir. Burada dedilər ki, 1990-cı ilin 20 Yanvar faciəsinə qədər sizdə qərənfil çox sevilib. Həmin müdhiş gündən sonra isə bu gül sevgililərin əlində deyil, şəhidlərin məzarı üstündə görünməyə başlayıb. Mən bu gülün adını Azadlıq çiçəyi qoyardım. Bundan başqa, sizin gözəl bayrağınız da var. Hələ ölkənizə gəlməmişdən qabaq onu öyrənmişdim. Vaxtilə həmin bayrağı sovet qoşunları endirib, yerinə öz bayraqlarını taxmışdılar. Amma on illər sonra siz həmin üçrəngli bayrağı yenidən müstəqil ölkənizin atributu kimi qəbul etmisiniz. Hiss edirəm ki, Azərbaycan xalqı keçmişinə, milli dəyərlərinə, ənənələrinə çox bağlıdır. Mən bütün Azərbaycan xalqına başsağlığı verir, azadlığınızın əbədi olmasını arzulayıram.