Millət vəkili Qənirə Paşayeva ön cəbhədə yerləşən Ağdam və Əlibəyli kəndlərində məktəblilər üçün kitab bayramı təşkil edib.

Kult.az xəbər verir ki, Qənirə Paşayeva müsəlman dünyası üçün müqəddəs bir ayda – on bir ayın sultanı Ramazanda uşaqlarla görüşü əhəmiyyətli hesab etdiyini vurğulayıb və onların hər birinə həyatda arzularına çatmalarını diləyib.

Millət vəkili bildirib ki, bir insanın inkişafı və gələcəyində onun təhsili, müəyyən peşə sahibi olması çox böyük önəm daşıyır və uşaqlarımız oxumağa, öyrənməyə daha çox meyilli olmalıdırlar. O qeyd edib ki, cəmiyyətin maariflənməsi, xüsusilə də savadlı, intellektual, vətənpərvər, daxili dünyaları zəngin gəncliyimizin yetişməsində və dünyagörüşünün formalaşmasında mütaliə xüsusi əhəmiyyət kəsb edir.

Qənirə Paşayeva uşaqlarla ayrı-ayrılıqda söhbətləşib, onların hər birinə müəllifi olduğu imzalı kitablarla yanaşı, müxtəlif maraqlı kitablar, jurnallar hədiyyə edib. Millət vəkili şagirdləri mənasız işlərə və ya verlişlərə, teleseriallara, şou proqramlara vaxt sərf etməməyə çağırıb:

“Ölkəmizin daha da inkişafı üçün gənclərin savadlı, təhsilli, elmə və kitab oxumağın meyilli olması əsas şərtdir. Hesab edirəm ki, inkişafın yolu kitabdan, oxumaqdan, öyrənməkdən keçir!”.

Qənirə Paşayeva məktəbin kitabxanasına da gənclərin oxuması üçün çoxlu kitablar hədiyyə edib.

O, eyni zamanda Ağdam və Əlibəyli kəndlərində idmana həvəskar məktəblilərlə də görüşüb, onlara idman formaları hədiyyə edib. Q.Paşayeva bildirib ki, gənclərimizin həm fiziki, həm də mənəvi olaraq güclü yetişməsi ən vacib məsələdir və idmanla fəal məşğul olmağa çağırıb.

Millət vəkili Qənirə Paşayeva gənclər arasında narkomaniyaya, siqaretə, qumar oyunlarına aludəçiliyin artmasından narahatlığını da bildirib və gəncləri bu zərərli vərdişlərdən tamam uzaq durmağa çağırıb.