AMEA-nın Arxeologiya və Etnoqrafiya İnstitutunun aparıcı elmi işçisi, tarix üzrə fəlsəfə doktoru Anar Ağalarzadənin tədqiqatları nəticəsində Masallı rayonunun Bədəlan-Xanalion kəndi yaxınlığında, Talış dağlarının ətəklərində kurqan tipli qəbir abidələri aşkar edilib.

Kult.az xəbər verir ki, torpaq örtüklü kurqanların diametri 45-50 m, üst örtüyünün saxlanılmış hündürlüyü isə 4-5 metrə çatır. Dəniz səviyyəsindən təxminən 870 metr yüksəklikdə salınmış bu qəbir abidələrinə kəndin ərazisində tək-tək hallarda rast gəlinir. A.Ağalarzadə abidələrin tunc dövrünün sonu, dəmir dövrünün əvvəllərinə (e.ə. II minilliyin sonu I minilliyin əvvəlləri) aid edildiyini bildirib.

Alim kurqanların tunc-erkən dəmir dövrü cəmiyyətlərinin sosial-iqtisadi, ictimai münasibətləri və qədim tayfaların təsərrüfat həyatı haqqında məlumatlar əldə etmək baxımından çox böyük əhəmiyyət kəsb etdiyini deyib:

“Cənub bölgəsinin dağlıq zonaları üçün daş örtüklü kurqanlar xarakterik olsa da, dağətəyi və aran bölgəsi üçün torpaq örtüklü kurqanlar üstünlük təşkil edir. Bütün bu fərqlilik abidələrin yerləşdiyi arealda aydın müşahidə olunur”.