Görkəmli bəstəkar, Azərbaycanın əməkdar incəsənət xadimi Tahir Əkbərin hazırda Təzəpir məscidində vida mərasimi keçirilir.

Kult.az xəbər verir ki, vida mərasimində bəstəkarın ailə üzvləri, yaxınları - müğənni Elza Seyidcahan, Aybəniz Haşımova, Zöhrə Abdullayeva, Faiq Sücəddinov, Hacı Nuran və başqa tanınmış sənət adamları iştirak edir.

Göz yaşlarını saxlaya bilməyən Elza Seyidcahan təəssüratlarını bölüşüb. O, etiraf edib ki, bəstəkarın son günlərində onun yanında olmadığı və ona dəstək ola bilmədiyi üçün özünü günahkar hiss edir:

"Çox sarsılmışam, özümü bağışlaya bilmirəm ki, onu görməyə getmədim. Tahir Əkbərin ölümü Azərbaycan mədəniyyəti üçün ağır itkidir. Ruhu şad olsun".

Qeyd edək ki, 72 yaşlı bəstəkar uzun müddət idi ki, beyin insultundan əziyyət çəkirdi. Mərhum bu gün Yasamal qəbiristanlığında dəfn olunacaq.