Türkiyə Super Liqasında keçirilən “Qalatasaray”-“Fənərbaxça” oyununda azarkeşlər Azərbaycanın “Qarabağ” klubuna dəstəklərini nümayiş etdiriblər.

Axar.az xəbər verir ki, bir neçə “Qalatasaray” azarkeşi əllərində “Qarabağ” sözünün hərflərini tutaraq klubumuza sevgilərini göstəriblər. “Qalatasaray” klubunun fan səhifələri sözügedən fotonu Azərbaycan bayrağı ilə paylaşaraq bu sözləri yazıblar:

“Qardaş “Qarabağ”a və gözəl azarkeşlərinə salam olsun. Biz birik!”

Qeyd edək ki, “Qarabağ”-“Atletiko” oyununda azarkeşlərin hazırladığı plakatla bağlı Türkiyənin nüfuzlu qəzetlərindən olan “Sabah” “Əzik xoreoqrafiya” başlığı ilə xəbər yayımlayıb. Xəbərin müəllifi Mövlud Tezel adlı köşə yazarı olub. Bu yazı ölkəmizdə geniş rezonans doğurub və yazar kəskin tənqid olunub. Daha sonra "Sabah" qəzeti və müəllif Azərbaycan xalqından üzr istəyib.