Çempionlar Liqasında İstanbulun “Beşiktaş” klubunun püşkatmadan sonra Almaniya çempionu “Bayern Münhen” ilə qarşılaşacaq olması 20 il əvvəl baş vermiş “Aldi” qalmaqalını gündəmə gətirib.

Axar.az xəbər verir ki, 1997-ci il sentyabrın 17-si “Beşiktaş” Almaniyada “Bayern”in qonağı olub. Qarşılaşma zamanı alman azarkeşlər “Aldi” marketlər şəbəkəsinin torbalarını nümayiş etdiriblər.

“Aldi” Almaniyanın ucuz marketlər şəbəkəsi olaraq məşhurdur. Bu ölkədə yaşayan türk əhali alış-veriş məqsədi ilə əsasən həmin marketlərə üz tuturdu. Almaniyada isə türkləri alçaltmaq məqsədi ilə bəzi qüvvələr tez-tez marketin torbalarından istifadə edirdilər. Bunu nəzərə alan “Bayern” azarkeşləri türk azarkeşləri alçaltmaq məqsədi ilə stadiona həmin torbalarla gəlib. Qarşılaşmanı 2-0 hesabı ilə qazanan “Bayern”in azarkeşləri torbaları qaldıraraq “Aldi”yə gedə bilərsiniz, sizin yeriniz oradır” şüarları səsləndiriblər.

Yaşanan hadisələrdən sonra Türkiyə və Almaniya arasında gərginlik yaşanıb. Türkiyə edilənləri irqçi münasibət olaraq qiymətləndirib və Almaniyaya sərt reaksiya verib.

“Bayern” azarkeşləri baş verənləri zarafat olaraq qələmə versə də, həmin gün dərc olunan “Hürriyət” qəzeti informasiyanı “İrqçilik yüksəlir” başlığı ilə yayımlayıb.