18:26

Fevralın 17-də futbol üzrə Azərbaycan Premyer Liqasının XVI turuna start verilib.

Axar.az xəbər verir ki, turun ilk qarşılaşmasında “Qəbələ” doğma meydanda “Zirə”ni qəbul edib. Qəbələ şəhər stadionunda keçirilən oyunda hesabı qonaq komanda açıb. Matçın 39-cu dəqiqəsində Alexandr Dedov “Zirə”ni hesabda önə çıxarıb – 0:1. Birinci hissə bu hesabla başa çatıb.

Matçın 55-ci dəqiqəsində “Qəbələ”nin futbolçusu Stiven Monroz hesabda tarazlığı bərpa edib. Qarşılaşmanın 64-cü dəqiqəsində “Qəbələ” ikinci topu qonaqların qapısından keçirib. Baqali Dabo adını tabloya yazdırıb – 2:1.

Beləliklə, görüş “Qəbələ”nin 2:1 hesablı qələbəsi ilə başa çatıb.

Bu qələbədən sonra “Qəbələ” 35 xalla ikinci pillədə yerini möhkəmləndirib. “Zirə” klubu isə 31 xalla turnir cədvəlinin üçüncü pilləsində qərarlaşıb.

***

“Sumqayıt” klubu doğma meydanda “Neftçi”ni qəbul edib.

Axar.az xəbər verir ki, Mehdi Hüseynzadə adına Sumqayıt şəhər stadionunda keçirilən oyunda hesabı meydan sahibləri açıblar. Matçın 13-ci dəqiqəsində Tural Axundov 11 metrlik cərimə zərbəsindən vurduğu qolla “Sumqayıt”i hesabda önə çıxarıb. Qarşılaşmanın 17-ci dəqiqəsində “Sumqayıt” ikinci topu qonaqların qapısından keçirib. Amil Yunanov baxımlı qola imza atıb – 2:0.

“Sumqayıt”-“Neftçi” matçının 61-ci dəqiqəsində bakılıların heyətində Rəşad Sadiqov birbaşa qırmızı vərəqə alaraq meydandan kənarlaşdırılıb. Komandaların cəhdlərinə baxmayaraq, qarşılaşmanın sonunadək hesab dəyişməyib.

Beləliklə, oyunda 2:0 hesabı ilə qalib gələn “Sumqayıt” xallarının sayını 24-ə çatdıraraq dördüncü sıradakı mövqeyini möhkəmləndirib. “Neftçi” isə 19 xalla beşinci pillədə qərarlaşıb.