İnanılmaz hisslərdir. Belə hissləri həyatımda ilk dəfədir keçirirəm. Azərbaycan gimnastikası tarixində tamblinq üzrə ilk qızıl medalı mən qazandım. Bu, mənim üçün çox əhəmiyyətli idi. Üzərimə düşən bütün məsuliyyəti başa düşürəm. Azərbaycan bayrağını ucaltmaq üçün daim qalib gəlməyə çalışacağam. Arzu edirəm ki, himnimiz daim səslənsin.

Bu sözləri Azərtac-a müsahibəsində Azərbaycan gimnastı, Milli Gimnastika Arenasında keçirilən batut gimnastikası, ikili mini-batut və tamblinq üzrə 26-cı Avropa çempionatının qızıl medalçısı Mixail Malkin söyləyib.

Gimnast deyib: “Əlbəttə, doğma məkan, dostlarım mənə güc verdi. Amma doğma divarlar arasında çıxış etmək daha çətin və məsuliyyətlidir. Azarkeşləri xüsusi vurğulamaq istəyirəm. Çox dəstək oldular. Çempionatda idmançılar arasında sağlam mübarizə və dostluq ab-havası hökm sürürdü. Axı uzun illərdir bir-birimizi tanıyırıq. Üstəlik, turnirin maskotu – məzəli personaj Qur-qur da hamımızı əyləndirdi”.

Mixail Malkin qeyd edib ki, qələbəsini nənəsinə həsr edib.