Futbol üzrə Azərbaycan Premyer Liqasında IV turun daha bir oyunu keçirilib.

Report xəbər verir ki, həftənin ikinci matçında "Səbail" "Bayıl Arena"da "Zirə"ni qəbul edib.

Matç 1:1 hesabı ilə başa çatıb. Görüşdə ilk qolu 68-ci dəqiqədə penaltidən qonaqların hücumçusu Pərdis Fərcad-Azad vurub. Yekun nəticəni isə 84-cü dəqiqədə Rahid Əmirquliyev müəyyənləşdirib.

Bu heç-heçədən sonra xalını 4-ə çatdıran "Səbail" 6-cı pillədə qalıb.

İkinci xalını qazanan "Zirə" isə 7-ci pilləyə yüksəlib. Ancaq matçda əsasnamə pozulub. Buna səbəb qəsəbə təmsilçisi tərəfindən oyunun protokoluna 1998-ci il təvəllüdlü futbolçunun adının daxil edilməməsidir.

Məsələyə AFFA İntizam Komitəsinin növbəti iclasında baxılacaq. "Zirə"yə texniki məğlubiyyət verilə bilər.